مال المواقيف غير رجالها
شيلة مزاين إبل قبيلة البقوم
سلام ياعزوتي منـي سـلام
تستاهلون الغـلا و الإحتـرام
ربعي ذرى الجنب يانعم الذرى
مال المواقيف غير رجالها
وأرفع سلام القبيله كلهـا
لأغلى وطن مهجتي يحتلهـا
حب الوطن فالقلوب معمرا
مال المواقيف غير رجالها
إمزاين البل رفع مقدارهـا
لعلهـم يكثـرون أنصارهـا
أعز ثروه على وجه الثرى
مال المواقيف غير رجالها
حان المزاين ياصبيان البقوم
ياهل المواقف قويين العزوم
ميعادنا قدم مانرجـع ورى
مال المواقيف غير رجالها
إمزاين البل رسمنا له وعد
وليا رسمنا الوعد ماغاب أحد
اللي درى يخبر اللي مادرى
مال المواقيف غير رجالها
فينا التعاون وعشق الطايلات
وليا إجتمعنا صنعنا المعجزات
إبليس ماباع فينا وإشتـرى
مـال المواقــيـف غيـر رجـالهــا
شيوخنا رايهم سوى سوى
وشعارنا شعرهم دوى دوى
وتاريخنا فالكتاب مسطرا
مــال المــواقـيــف غيـر رجالهــا
سيرة بطولات وإنجـازٍ فريـد
دون تربه قلعـة المجـد التليـد
من تحت رضوان لا رأس القرا
مال المواقيف غير رجالها
فرساننا تنطح الجمع المخيف
حملات الأتراك وجيوش الشريف
سالت رياحين بالدم أحمـرا
مـــال المواقيــف غــيــر رجالــهـــا
أحب ربعي وأضحي لجلهم
أنشر فخرهم وأماري بإبلهم
لاإلـه إلا الله والله أكبـرا
مال المواقيف غير رجالها
حنا قبايل واهل غرس ومدر
وأهل مجاهيم ومغاتير وصفر
فرسانها كل مـارد البـرى
مال المواقيف غير رجالها
البل عطايا الله اللي زانها
تاخذ من لون السحاب الوانها
حلال قاده وساده وأومرا
مال المواقيف غير رجالها
الله ذكرها لها خلق عجيب
سفن الصحاري موديت الغريب
ياماجرى فوقها ياماجرى
مال المواقيف غير رجالها
حنا إحتفظنا بها ونحبها
وبعض العرب يوم غفّل كبها
من لاقنوها يعدَون فقرا
مال المواقيف غير رجالها
سودٍ ليا شفتها مثل الهضاب
هزع الغوارب طويلات الرقاب
لعلهـا مايراهـا الأقشـرا
مال المواقيف غير رجالها
والوضح عشاقها مايسمعون
يازينها كنها بيض المـزون
ولا البرد من سحابه لمطرا
مال المواقيف غير رجالها
والشعل مثل الشفق عند الغروب
ولا الذهب يجذب القلب الطروب
حلال بـدوٍ عـوارف وخبـرا
مال المواقيف غير رجالها
والصفر يازين سمك شعافها
محلى التمشاي في طرافهـا
وصفتها مثل لون العنبـرا
مال المواقيف غير رجالها
تجسر بنا كل ماطاح السحاب
تحت الثميدي وسلات الحراب
نرعى بها ديرة القوم جهـرا
مال المواقيف غير رجالها
قدام نعط الولاء لبن سعود
اللي تخاضع له رقاب الأسود
عبد العزيز الزعيم الأكبرا
مال المواقيف غير رجالها
من يوم طب الرياض من الكويت
حل الرضى والهناء في كل بيت
حظه مخاويـه يومنـه سـرى
مال المواقيف غير رجالها
اليوم حنـا جنـودك ياوطـن
حب الوطن والملك فينا سكـن
رفرف طرب ياعلمنا الأخضرا
مال المواقيف غير رجالها
---
الشاعر - فيصل الرياحي البقمي رحمة الله علية
مع تحياتي
AL GOKER