لا تساليني ليش متلوع ومهموم خلي بقلبي الجرح والدمع بهدابي
ما دام خبز الوعد ما بيشبع المحروم يا ريت مات العشق جوعان عزابي
جربت كون الحبيب العاشق المغروم حب بامانه وصدق واخلص لاحبابي
ضيعت عمري بحوا وجنسها المهضوم وشوفي حكايا وقصص مرقت على كتابي
حبيت شقرا وقلت هالورد مو مشموم الخد جوري حما والتم عنابي
سيجت احلامها بزهر وشمع ونجوم وسجلت بحسابها الي كان بحسابي
واول ما فاح العطر والنحل صار يحوم عبيت قلبي غرام وفضيت جيابي
راحت وقالت الي الاخلاص ما بيدوم ما دام جيبك فضي مسامح باتعابي
وحبيت بيضا على مبسمها القمر مرسوم حلوه بعمر الورد وكتير جذابي
قالت بحب التضحيه والصدق مفهوم صدقت كلماتها وريحت اعصابي
ولما لقيت بفعايلها الصدق ملغوم وحملت قلوب البشر وحشية الغابي
قلت الي قلبو حجر ما بيرحم المظلوم والناس اطباعها للشر غلابي
وحبيت سمره المسك على خدودها مختوم وعيون فيها حواري العين منصابي
الوجه دورة قمر وشمة عرب موشوم وشفاف تسكب عسل من اجمل خوابي
دبت بحلاها وبميلة خصرها المبروم وما لحقت اوصف لها حبي واعجابي
ضحكت وقالت الي لا تتعب ولا تلوم من دون همس ولمس عم دوب بتيابي
ان حبيت احكم انا وتبقا الي محكوم سجل العصمه بايدي بتعرف جوابي
ولما لقيت العشق بدو نبي معصوم سكنت قلبي بقفص وسكرت ابوابي
وايقنت انو بجنس حوا الصدق معدوم واصدق ما فيهم ثلاث ارباع كزابي