قصيده اهداء الى كل ام بمناسبة عيد الام

حولك يا ام اولادك التمو ويلي بحضن امو شو بهمو
بتخايلك بتخايل العصفور يلي فتح تمو ونط امو
وامو الي على حبة قمح بدور بتشبع اذا بتشوفها بتمو
تخايلت فيكي الشمس نار ونور وكلما الصبح لولحلها بكمو
بتترك النار بقلبها وبدور بغزلة خيوط النور بضمو
تخايلت فيكي الشاطئ المغمور وموجه وموجه اولادك تسمو
باجزرمتل المركب المهجور وبالمد عاصدرك بيلتمو
تخايلت فيكي الطيب والبخور لولا ما احترق ما بنقدر نشمو
وشمعه بتشرب دمعها بسرور وقنديل زيت فتيلتو دمو
تخايلت فيكي الزرع والناطور تعب وشقي وهم الزرع همو
تحرم على الناطور زرعو يزور اول ما فاح العطر من كمو
الارض متلك عمرها منذور لاولادها الي فيها بيهتمو
وعمرك كتاب معنونو بسطور بعدة وصايا الناس بيهمو
الي بياكل القمه من التنور من العار لما بيشبع يذمو
ويلي بيشرب من بئر مهجور لا يردمو وياذيه ويطمو
وجارك اذا عليه الزمن بيجور لا تهجرو خليك من يمو
الانسان مركب والحياة بحور شراعو ابن خالو وابن عمو
صادق صديق مهذب وغيور سرورك الو وهمك سبب همو
العقرب اذا بتعطف عليه شهور بغفلة عين بيجرعك سمو
واخر وصيه حروفها من نور قانون شرع ومنطق ودستور
الانسان امو همها همو عاش بكنفها ودمها دمو
وكتبة الحنيه على تمو يارب يارب يارب لا تحرم حدا امو

ارجو منكم تشجيعي ولو بكلمه حتى نستطيع ان نعلو بهاذا المنتدى الى اعلى مستوا من الرقي